UKA 2001/77
Aalisarneq pillugu Inatsisartut inatsisaata allanngortinneqarneranik Inatsisartut inatsisissaattut siunnersuut
pillugu
Inatsisartut Aalisarnermut, Piniarnermut Nunalerinermullu Ataatsimiititaliaata
ISUMALIUTISSIISSUTAA
Siunnersuutip aappassaaneerneqarnerani saqqummiunneqartoq
Inatsisartut Aalisarnermut, Piniarnermut Nunalerinermullu Ataatsimiititaliaat suliarinninnermini ukuninnga inuttaqarpoq:
Inatsisartuni ilaasortaq Johan Lund Olsen, Inuit Ataqatigiit, siulittaasoq
Inatsisartuni ilaasortaq Lars Karl Jensen, Siumut, siulittaasup tullia
Inatsisartuni ilaasortaq Simon Olsen, Siumut
Inatsisartuni ilaasortaq Augusta Salling, Atassut
Inatsisartuni ilaasortaq Mads Peter Grønvold, Kattusseqatigiit
Inatsisartut Aalisarnermut, Piniarnermut Nunalerinermullu Ataatsimiititaliaata UKA 2001-imi siullermeerinerup kingorna aalisarneq pillugu Inatsisartut inatsisaata allanngortinneqarneranik Inatsisartut inatsisissaattut siunnersuut nassuiaatitai ilanngullugit misissorpaa.
Ataatsimiititaliap sulinera.
Siunnersuutip matuma ataatsimiititaliami suliarineqarnissaanut atugassatut tusarniaanermit akissutisiat Naalakkersuisunit pissarsiarineqartut nuutinnerinik ataatsimiititaliaq tigusaqarsimavoq. Tamatuma kingorna inatsisissatut siunnersuut ataatsimiititaliap ataatsimiinnerini marlunni suliarineqarpoq.
Inassuteqaatit naalakkersuinikkullu oqaaseqarfiginninnerit.
Aalisarneq pillugu inatsimmi allannguutissatut siunnersuutigineqartut ukiakkut ataatsimiinnermi matumani piviusunngortinneqarnissaasa Naalakkersuisunit suliniutigineqarsimanera ataatsimiititaliamit nuannaarutigineqarpoq.
Tamatuma peqatigisaanik aalisarneq pillugu inatsisip tamakkiinerusumik 2002-mi upernaakkut ataatsimiinnermi nutarterneqarnissaata Naalakkersuisunit suliniutigineqarnissaa ataatsimiititaliamit qilanaarineqarpoq. Tassunga atatillugu nutarterinermi tassani aalisarnermi akuusut sukumiisumik peqataatinneqarnissaat qanoq pingaaruteqartiginersoq ataatsimiititaliamit erseqqissarneqassaaq.
Tamanna tunngavigalugu ataatsimiititaliap inassutigaa aalisarneq pillugu Inatsisartut inatsisaata allanngortinneqarneranik Inatsisartut inatsisissaattut siunnersuut siullermeerneqarnermisut iluseqarluni akuersissutigineqassasoq.
Taama oqaaseqarluni Inatsisartut Aalisarnermut, Piniarnermut Nunalerinermullu Ataatsimiititaliaata aalisarneq pillugu Inatsisartut inatsisaata allanngortinneqarneranik Inatsisartut inatsisissaattut siunnersuut aappassaaniigassanngortippaa.
Johan Lund Olsen
siulittaasoq
Lars Karl Jensen Simon Olsen
Augusta Salling Mads Peter Grønvold